تانرينين آديلا
يولداش لاريميز؛ بو وئبلاقا خوش گليبسينيز
بيز چاليشاجاغيق بو وئبلاگدا توركجه شئعرلر،
حيكايه، ادبي متن و مقاله، چئويرمه و... توپلاياق.
ديه رلي يولداشلاريميز لوتفن بيزي يارديم ائدين
يازي يوللاماقلا،يورملارينيزلا و گؤروشلرينيزله
سحر يئلي پرده ني قولچاق كيمي اويناديردي، آچيشقانين هر بوجاغيندان ايچه ري يورويوب يورقون هاوايا يئني جان وئريردي. هاوادا يورقون اولا بيلر؟ هه يورقون اولار، يولچو يورولماز اولسا هاواني دا يورار.
يازار: آي سو
دويون
من بي قارانليغا دوشموشدوم كي چيخا بيلميرديم، هر طرفه آتديم آتيرديم اوچوروم قورخوسو واريدي...
سن ائله ايدديعالي اولدوغوندا، ائله داوراندين كي سندن سونرا كيمسه يه اينانا بيلميرديم، منه ساري گلن هر كس زهر قوخويوردو، گؤزومه هر باخان باخيشدان خيانت ياغيردي، سئوگي سؤزو ائشيدنده آجي دوشونجه لر بئينيمي سانجيردي، قارا بير اؤرتوك اوزومو توتموش، گؤزلريمين اؤنون قارا باخيشلارين بوروموشدو، قارانليق گئجه لريم قورتولماق ايسته ميردي، كه دريم سونسوزويدو سانكي.. و سن يوخويدون اللريمي دوتوب ايستي تبسسومونله اوره ييمين بوزلاريني اريده سن، گئجه ايله ساواشيب مني قارانليقدان آلاسان.
بير گون سن ائله پيس دئديك لرينين بيري اليمي دوتوب مني بو قارانليقدان چيخارتدي، ايسته مه سمده منه اومود وئريب، ياشاييشيما اومود گتيردي، سنه گووه ندييم قدر اوندان قورخوردوم، آما هئچ اينجي مه دي، هئچده اوزولمه دي، ان اؤنملي سي هئچ مني آلداتمادي دا. او مني اؤزوم ايچين سئوير، بير اينسان كيمي ياشايير و منله بير اينسان كيمي داورانير و من اونو اونداندا چوخ سئويرم.
يازار : آي سو
جانيم بو طرفلره چوخ گل، اوره ييم يامان داريخير سنه، هر آن سني گؤرمك ايسته ييرم، اللريني اللريمده دوتوب بو شهرده دولانماق ايسته ييرم، بيلميرم ندندي سني، هر زامان يانيمدا دوشونورم بو شهرين هر كوچه سينه آياق آتديغيمدا سن منينله سن، هر نه يه باخديغيمدا سنين باخيشينين تاييدين ايزله ييرم، توم ثانيه لريم سنله گئچير... آما اؤزومه گلديييمده سن يوخسان...
سني بو شهرده گؤزله ييرم و بيليرم بو ياخيندا سنله بو شهرده، شهرچاييندا گؤروشه جه يم. خوشاكويا گئتمه سكده، دوققوز پيلله دولابلاري بيزه يئتر، بنده گئتمه يه واختين اولماسادا، اورمان پاركينين گون باتان لار اوقدر گؤزل دير كي بير دونيايلا دييشمك اولماز. شور گؤلونون سون نفس لري اولسادا بئله يئنه گؤرمه لي دير....
گل؛ اؤزونوده گتير، اورمو هله ده گؤزل دير و اورمودا بير قيز الينده چيچك، چاي قيراغيندا سني گؤزله يير، سني اؤزله يير، تئز گل..
يازار: آي سو
دئيم گله جك سن
گؤزوم دوشدو تزه آيا
دئديم هلبت گله جكسن
قند اليمدن دوشدو چايا
دئديم يقين گله جكسن
اولدوزلاردان نور سوزولور
اوره گيم هئچدن اوزولور
قاب- قاشيق رديف دوزولور
دئييرم داي گله جك سن
گؤروشوندن پاي اومموشام
گليرسن گل يورولموشام
گينه سؤزومده دورموشام
گله جكسن، گله جك سن
دئديلر كي عشقه داليب
اؤزگه سينه شوراه ساليب
گؤزلرينده گؤزوم قاليب
اينانميرام گله جكسن
گلديم گؤروم سؤزلر دوزدو؟
اوره ييمي كدر اوزدو
سئوينج منه دوداق بوزدو
نه جور دئييم گله جك سن؟؟
سحر خانيم
من كي سن دئييلم...
اونوتمادي گوزلريني
گوزلريم
منيم گوزوم سنين
گوزون دئييل كي
او يئرلري ناخيشلايير
ايزلريم
منيم ايزيم،سنين
ايزين دئييل كي
يانلارا اؤيرتمه ديم
ديليمي
منيم ديليم،سنين
دييلين دئييل كي
هر يئته نه
اوزاتماديم اليمي
منيم اليم،سنين الين
دئييل كي
اوچوب گئتدين سازاق
دوشدو كونلومه
منيم قلبيم ،سنين
قلبين دئييل كي
سن گولوش چون يارانيب
سان،اينله مه
منيم غميم ،سنين غمين
دئييل كي
سن قارالتدين،من
آغارتديم ساچيمي
منيم ساچيم،سنين
ساچين دئييل كي
ائشيدنلرباغيشلاييرسوچومو
منيم سوچوم،سنين
سوچون دئييل كي
يئره دوشدو،اودلو
سوزوم كوزه ردي
منيم سوزوم،سنين
سوزون دئييل كي
قارشيلاشديق،ديل سوسدو
،اوز قيزاردي
منيم اوزوم،سنين
اوزون دئييل كي
سن يولونو دييشديردين
بيرسحر
منيم يولوم،سنين
يولون دئييل كي
بوهيجرانا دؤزه جه يم
بير تهر
!دوزه جه يم،هيجران
اولوم دئييل كي
(نصرت كسمنلي)
يارديم
كپز قافقاز،
اورال آلتاي،
آنا دولو داغلاريندان، دوغان گونش
گونئي ده كي قارانقولوق اوبالارا
نور ساچماقدان، اوشونورمو؟؟!
شاعير: بابك اسدي
....
آيريليغين باغرينا، آتدي مني گئتدي يار
حسرت ايله نيسگيله، قاتدي مني گئتدي يار
وئرمه ميشم وئرمه رم،بير توكون بير دونيايا
بير ماشينا، بير ائوه، ساتدي مني گئتدي يار
َ..
اومود
قورد اوركليم، آرخاداشيم
كدرلنمه گؤز ياشيما
اينان اودلو باخيشيما
سانجيلانميش كؤپك كيمي
باغيراجاق اؤنوموزده
ياغي دوشمن.
شاعير:بابك اسدي
...
بوراسي يئنيلنمز قارداشيم!
آرينمام
اوداسي توز باسميش گئجه مين پنجره سيندن
سوپورولمم
ياتاغيمدا جان وئره ن شئعير لرين گنجلييينده ن
كويدن ـ كويه داشينان منليييمي
چرچي لر تاباغيندا ساتامام قارداشيم !
زهر كيمي قاينايان گئچميشيمي، دونيانين چاناغينا ،
قاتامام قارداشيم !
دونيا يئنيلندي...
اوكسوز گونشين آلوولانان ساچينا ،خينا گولو تاخدي مي
يوخسا اوتانجاق اولدوزلارين سوپ ـ سوغوق دوداقلارينا...
بوراخ
يئنيلنمز
بوراسي يئنيلنمز قارداشيم!
قارانليق
سالخيم چيچكلي اولكرلرين،قاداسيني آلان گئجه دن
اللريم
اللريم خينالي قالان گئجه دن
بوراسي يئنيلنمز
يئنيلنمز قارداشيم !
شاعير: ائلناز ايسلاموند
