دئيم گله جك سن
گؤزوم دوشدو تزه آيا
دئديم هلبت گله جكسن
قند اليمدن دوشدو چايا
دئديم يقين گله جكسن
اولدوزلاردان نور سوزولور
اوره گيم هئچدن اوزولور
قاب- قاشيق رديف دوزولور
دئييرم داي گله جك سن
گؤروشوندن پاي اومموشام
گليرسن گل يورولموشام
گينه سؤزومده دورموشام
گله جكسن، گله جك سن
دئديلر كي عشقه داليب
اؤزگه سينه شوراه ساليب
گؤزلرينده گؤزوم قاليب
اينانميرام گله جكسن
گلديم گؤروم سؤزلر دوزدو؟
اوره ييمي كدر اوزدو
سئوينج منه دوداق بوزدو
نه جور دئييم گله جك سن؟؟
سحر خانيم
من كي سن دئييلم...
اونوتمادي گوزلريني
گوزلريم
منيم گوزوم سنين
گوزون دئييل كي
او يئرلري ناخيشلايير
ايزلريم
منيم ايزيم،سنين
ايزين دئييل كي
يانلارا اؤيرتمه ديم
ديليمي
منيم ديليم،سنين
دييلين دئييل كي
هر يئته نه
اوزاتماديم اليمي
منيم اليم،سنين الين
دئييل كي
اوچوب گئتدين سازاق
دوشدو كونلومه
منيم قلبيم ،سنين
قلبين دئييل كي
سن گولوش چون يارانيب
سان،اينله مه
منيم غميم ،سنين غمين
دئييل كي
سن قارالتدين،من
آغارتديم ساچيمي
منيم ساچيم،سنين
ساچين دئييل كي
ائشيدنلرباغيشلاييرسوچومو
منيم سوچوم،سنين
سوچون دئييل كي
يئره دوشدو،اودلو
سوزوم كوزه ردي
منيم سوزوم،سنين
سوزون دئييل كي
قارشيلاشديق،ديل سوسدو
،اوز قيزاردي
منيم اوزوم،سنين
اوزون دئييل كي
سن يولونو دييشديردين
بيرسحر
منيم يولوم،سنين
يولون دئييل كي
بوهيجرانا دؤزه جه يم
بير تهر
!دوزه جه يم،هيجران
اولوم دئييل كي
(نصرت كسمنلي)
....
آيريليغين باغرينا، آتدي مني گئتدي يار
حسرت ايله نيسگيله، قاتدي مني گئتدي يار
وئرمه ميشم وئرمه رم،بير توكون بير دونيايا
بير ماشينا، بير ائوه، ساتدي مني گئتدي يار
َ..
گله جك:
يازيرام من. گله جكدن،
ايناميم وار گله جك سن، هر گئجه سندن يازيرام.
بو قارانليق كوچه يوخ!!
بو ايشيقلي شهره من يئنه سندن يازيرام،
هر يئره من يازيرام:
هااااي گلن، او گؤزل گؤزلريني تيكمه گؤيه.
اوتانير گؤي گول اوزوندن!!
نه بيليرسن نه چكير آي سنه باخديقجا گؤزل؟!؟
آيين حيسسين من بيليره م.
بيرده يالنيز او بيلير من نييه سندن يازيرام.
بو قارانليق شهري سنله بيرليكده گزيرديك؛
اليميزده نه چيراق وار
نه ده بير شام.
ايزله ييردي بيزيم آدديملاري يالنيز
قارا طوفان.
بيرده بو آي ال اوزاتميشدي
بيزه يارديم ائتمك هوسي ايله.
بو ايشيق ال باشيميزدا يول گئديرديك
آي، ايشيق لي باخيشي ايلا بو قارانليق شهره نور ساليردي
اوندان ايلهام آليب
هر كوچه يه بير چيراق آسماق نه گركلي!!
دوشونوردوك كي ايشيق لي شهر اولسون
بو گؤزل يورد.
يانسين هر يئرده چيراق،
داها غملي گئجه لر اولماسين هئچ يئرده
ائليميز بختور اولسون.
قارا طوفان
يئنه ايزليردي بيزي
آما بيز بيلمه ديك كي بولودلاردا قارانليق لا گليردي...
آي توتولدو..
سنده گئتدين...
بيلمه ديم هاردا ايتيلدين...
بو قارانليقدا اليم هر گلني «سن» دوشونوب
الين آلقيش لا سيخيردي...
بير زامان لاردا اولوردو
بو سويوق اللريمي بيري احساسلا سيخيردي
نه بيليرسن نه گؤزل دويغولو آنلار يارانيردي
دوشونوردوم هامي بيرليكده سني آختارما هاييما، هاي وئريردي
شهرين هر باخيشي من اولوب،
سني سسليردي او گون
گلمه دين سن...
آما اؤيرندي شهر
ال-بير اولماق نه گؤزل دير..
بير اولوب، بير ياشاماق
كؤتو و قورخولو احساسلاري آتماق
نه گؤزل دير
...
ييغيشيب بيرگه گئديب
آي-ي گؤردوك
گول اوزوندن قارا اؤرتوكلري آچديق
...
ايندي طوفان يئنه ايزلير بيزي آما
گله جك گلمه ده دير،
سنده گلرسن و گؤررسن
من نييه سندن يازيرام.
آي سو
قارشيندا بويون بوروب
دايانماقدان چوخ سئوينيرسن
ائله دئييل مي؟
بير كيشينين غرور گوزگوسيني سينديرماقدان
سئوينيرسن،گولورسن
ائله دئييل مي؟
آنجاق گوزگونون سينيغيدا گوزگودو
بونو دوشون:
دالغالانير هر بير تيكه سينده
سئودا اوچرومونون صداقت دالغاسي
او بير اوغلانين سئوگي معناسي
يقين چكمگ ايسته ييرسن دارا
او قاپ – قارا
نيفرت باخيشلي گوزلرينين اوستونده اولان
كامان قاشلاروين اورتاسيندا
بلكده گوزلريني بئزه ين
مسموم سورمه نين گوجيله
اولدورمك ايسته ييرسن
منيم غرورومو،
منيم بو صاف، صاديق ،درين دويغومو
اولمز، اولدوره بيلمز
منيم دويغومو
سنسن لئنز قويدوغون او قارا گوزلر
و بالدان آجي دئديگين سوزلر
سئوينمه بوش يئره
اي فيمينيزم دوشونجه لي قيز
قالماياجام كي يالقيز
سئوه جه يم دنيزي ماوي
اوفوقو سئوه جه يم قيپ – قيرميزي
سئومه يجم كي سني
سئوه جه يم
اينسان دوشونجه لي قيزي
شاعير: هاشيم موغانلي
گئت
گئتمگ ايسته ييرسن
بهانه ايله گئت
هايلا گئت
اوياد مورگولو خاطيره لري
نه سسين همن سسدي
نده كي باخيشين
گئديرسن ايكيسي ده يوخ اولسون باري
سن چيچكلر ايچره بيتميش
هرزه بير آلاق
نه قيشين وار نده كي يازين
بيلميردين پاييزدا چيچكلر سولاجاق
سيناجاق سنين او كوك سيز سازين
گئتمگ ايسته ييرسن
هم دانيش همده دين
قوي بيلسين عالم
سن سئون دئييلدين
قوي بيلسين كي
سن ديرچه لمگه گوبه لك كيمي
ييخيلميش آغاج گوزله ييردين...شاعير: هاشيم موغانلي
سيرلار يوردونون يولچوسو
سن سيرلار يوردوندان گليبسن
و من سندن قورخورام...
...پري
تورپاق
هه، اينسان همئشه سيردان قورخور
گرك واختيندا ياتايديم
گؤز ايچين ياخشي گؤزلليك لر
قولاق ايچين ياخشي لاي لالار
و اوره يه ان گؤزل هئديه
سن هاردان گليرسن، ائي پري؟؟
بو تورپاقدا يول ايتيريب سن؟؟
يوخسا يولچوسان؟؟
و من
گرك واختيندا ياتايديم،
بلكه، سنين يوخونو گؤره يديم....
توركجه يه چئويرن: آي سو
گل گؤزليم
شيرين ديلليم هايانداسان؟ ندن مني بوراخيب گئتدين؟ هانسي باغيشلانمار سوچوما جزالانديردين؟ دئ گؤروم، ندن سنسيزليگه محكومام؟
من بو بويالي دونيادا يالنيز سني سئچميشديم، يالنيز سني سئوميشيم، مني بوراخديغيندا بونا دوشوندون؟؟ بو مين-بير رنگ دونيادا كي آغيندان قارا تؤره نير، قاراسيندان آغ! دئ گؤروم هانسي رنگ سني منه قايتاراجاخ؟
شيرين ديلليم، گولر اوزلوم، باخ گؤر سني سئومك مني نه موتلو اينسان ائديب گؤر من ابللردي سن سيز هله ده سنين قوخونلا موتلو ياشاببرام.. سن گل سوچوم نه اولسا اؤنمي يوخ، جزا نه يازسان بويون اولارام. گل ساده جه گولوشونله مني دلي ائت، گل، شيرين ديلينله آغ آتلي شاهزاده لر دونياسينا آپار. گل، گول اوزونله مني گولدور.. سئويندير..
سن سن منيم وارليغيم، وارسانسا وارام، يوخسانسا تئيخا سني گؤزله يه جه يم..
سن سيز ايللردي قار دوشوب دونياما ساچلاريمي آغ-آپباغ آغارديب. گل يازلاندير، چيچك لندير دونيامي. من ياز نغمه سييم گل قوي گوللر آچيلسين...
يازار:آي سو