ايزلريميز
azərbaycan ədəbiyatının gözəlliklərindən bir bucaq

سيناو


سحر يئلي پرده ني قولچاق كيمي اويناديردي، آچيشقانين هر بوجاغيندان ايچه ري يورويوب يورقون هاوايا يئني جان وئريردي. هاوادا يورقون اولا بيلر؟ هه يورقون اولار، يولچو يورولماز اولسا هاواني دا يورار.
كيتابا باخدي، يالنيز اون واراق قالميشدي سونا چاتسين، آما يورقون كيرپيك لري گؤزلرينين آياغينا دوشموش، يالواريب ياتماق ايسته ييب اونا اوخوماق ماجالي وئرميردي. دئيسن يئل گؤزونون پرده سيني ده اويناديردي، ساعات 6:33 گئچيردي، دوروب اوزونو يويوب يئنه اوخوماغي باشلادي، آخي اؤزونه سؤز وئرميشدي سيناودا بيرينجي نومره ني آلسين، سؤزونون اوستده دورماماق اونا اؤلومدن پيس ايدي، سونوندا دوشوندو كيتابين تومونو اؤيره نيب. سئينيب بيليم يوردويا گئتمه يه حاضيرلاندي، بير ليوان سود ايچيب يولا دوشدو
سحرين سرين يئلي دريسيني سيغيشديريردي، سوبح خلوت خيابان لاردا آتديم آتماغي چوخ سئويردي و آتديم آتاركن سئوديي ماهنيني تيكرارلاييردي:«چيرپينيردي قارا دنيز... » اورك دويونتوسو اوندان قرار آلميشدي بيلميردي ندن بئله اولور بو سيناو اونو گله جه يه توكدويو پيلانلارا ياخينلاديري، آما بيلميردي ايندي ندن اوره يي بئله دويونور، تبسسومله زيمزيمه ائتدي «قارا دنيز يوخسا منين اوره ييم؟؟»
بيليم يوردودا يولداشلاريلا گؤروشدو بيلمه ديك لريني بيربيريندن سوروشوب يانيت آلديلار.
سيناو باشلاناركن سورولارين تومونه باخدي، تومونو باشاريردي، هاوانين بير گؤزل دادي وارييدي... 
يولداش لاري سؤز وئرميشدي لرياخشي نومره آلسا، ارشد سيناوينا باخماياراق يئنه اولارا قاتيلا بيلر.. سئوينجله يانيت يازماغا باشلادي؛ بير.. ليكي.. اوچ..
اوچونجو سورويا يئتيرنده  قيزاران آيين(خوردادين) اوچو يادينا دوشدو، هئچ زامان او گونو اونودا بيلميردي هر «اوچ» سؤزونو ائشيتديينده ايستر- ايسته مز خوردادين اوچو يادينا دوشوردو و او گونون شهيد لري... گؤزوندن بير داملا ياش آخدي، تيكرارلادي:«قانيمين سون داملاسي بو گؤز ياشيم كيمي آخسادا يولونوز هر زامان داواملي دير...»
يئنه سورولاري يانيتلاماغا باشلادي، آما بير آن هاوادا بير آغيرليق حيس ائتدي، باش قالديريب اوچ امنييتي قووه ني باشي اوستده گؤردو، اونا «دور!!» حوكمو وئرديلر. شاشقين جاسينا سينو كاغيذينا باخدي، ايييرمي سورودان يالنيز اوچ سورونو جاوابلاييب نئچه آلا بيلردي؟؟ «يالنيز اوچ!!»  يولداشلارينا وئردييي سؤزو يئرينه يئتير مه ميشدي آما بو اوچون اونا باشقا بير دادي واريدي...


يازار: آي سو



یارپاق لار : 1


Powerd By : ARZUBLOG.COM Theme Designer : Blogskin.ir