ايزلريميز
azərbaycan ədəbiyatının gözəlliklərindən bir bucaq
یاییلیب : پنجشنبه 17 فروردین 1391 | یازار : آي سو،ساراي سولدوزلو | بؤلوم : ادبي متن لر | 2 باخيش لار

دويون


منه اينانديرميشدين كيمسه مني سئومه ز، اينانديرميشدين منله ايلگيده اولان اركك لر مني آلداتيب گئده جكلر. سن آجي بير خاطيره اولوب ياشاييشيمدان گئتسنده بئله بو سؤزون ايچيمده بير درين ايز بوراخميش اونون ايچينده اوره ييمي بير سير اولاراق گيزله ميشديم و هئچ ارككه ايزين وئرميرديم بو سيرلاري آچسين. اوزون موددت اؤزومه اينانديرا بيلميرديم سن اؤزونو ملك تانيتديرام، تمي و ايلقارينا باغلي قالان اوغلان!! مني آلداتيب گئديبسن. بو اساسدا سنين دؤنمه ييني گؤزله ييرديم، اؤزومدن سوروردوم هاني گلدي؟؟ دئميشدي تئز گله جه يم، بس هاردا قالدي؟
من بي قارانليغا دوشموشدوم كي چيخا بيلميرديم، هر طرفه آتديم آتيرديم اوچوروم قورخوسو واريدي...
سن ائله ايدديعالي اولدوغوندا، ائله داوراندين كي سندن سونرا كيمسه يه اينانا بيلميرديم، منه ساري گلن هر كس زهر قوخويوردو، گؤزومه هر باخان باخيشدان خيانت ياغيردي، سئوگي سؤزو ائشيدنده آجي دوشونجه لر بئينيمي سانجيردي، قارا بير اؤرتوك اوزومو توتموش، گؤزلريمين اؤنون قارا باخيشلارين بوروموشدو، قارانليق گئجه لريم قورتولماق ايسته ميردي، كه دريم سونسوزويدو سانكي.. و سن يوخويدون اللريمي دوتوب ايستي تبسسومونله اوره ييمين بوزلاريني اريده سن، گئجه ايله ساواشيب مني قارانليقدان آلاسان.
بير گون سن ائله پيس دئديك لرينين بيري اليمي دوتوب مني بو قارانليقدان چيخارتدي، ايسته مه سمده منه اومود وئريب، ياشاييشيما اومود گتيردي، سنه گووه ندييم قدر اوندان قورخوردوم، آما هئچ اينجي مه دي، هئچده اوزولمه دي، ان اؤنملي سي هئچ مني آلداتمادي دا. او مني اؤزوم ايچين سئوير، بير اينسان كيمي ياشايير و منله بير اينسان كيمي داورانير و من اونو اونداندا چوخ سئويرم.

يازار : آي سو





یاییلیب : شنبه 12 آذر 1390 | یازار : آي سو،ساراي سولدوزلو | بؤلوم : ادبي متن لر | 0 باخيش لار
گونش و يئل


بير گون يئل اؤز گوجونه گووه نركن دوشونر:«ندن من گونش دن آشاغيدايام و هامي گونشي مندن اوستون بيلير، او نه بير شئي يئريندن اوينادا بيلرنه ده بير ايش گؤره ر.. آما من هر نه ايسته سم داغيدارام و هرنه يي هر  يئره ايسته سم آپارا بيلرم...» بو دوشونجه ايله گئدير گونشين يانينا و دئير « سنجه سنين قودرتين چوخدور يوخسا منين؟؟» گونش ساده جه گولوب دئيير:« سن ندن اؤزونو منله توتوشدوروبسان؟ اولمايا اؤز گوجونه بيلگين يوخدور؟» يئل بو سؤزدن آجيييب هيرسله دئييير:« ايسته ييرسن گل ياريشاق؟» گونش يئنه گولر اوزلو دئيير:« سن نئجه دئسن ائله ياريشاق..» يئل يئرده چاي قيراغيندا اولان كيشي ني گؤرسه ديب دئير گل گؤرك هانسيميز بو كيشي نين پالتارلاريني چيخارا بيلريك؟» گونش دئير «اؤنجه اؤزون سينا..» يئل قانادلاريني اوزالديب چاليشار كيشينين پالتاريني چيخارتسين، آما كيشي موحكم ياپيشار كؤيرگيندن و قويماز يئل آپارا، يئل يئنيدن گوجونو چوخالديب بير داها چاليشار، آما كيشي ده موحكم ياپيشار پالتاريندان. يئل تام گوجوايله اسر بلكه كؤيرگي چيخارتسين آما كيشي بير آغاج تاپيب، سيغينار دالداسينا و موحكم ياپيشار كؤيرگيندن.. يئل پالتاري چيخارتماق دان ال چكيب گلر گونشين يانينا دئير من چيخارا بيلمه ديم بيليرم سنده چيخارا بيلمزسن آما ايسته ييرسن سينا.. گونش تبسوم له كيشي يه باخيب بيراز ايستيسيني چوخالدار، كيشي كؤيرگينين دوگمه لريني آچار، بيرازدا ايستي سيني چوخالدار، كيشي ترله ييب كؤيرگله تريني سيله ر. گونش يئنه ايستي سيني چوخالداندا كيشي كؤيرگي چيخاريب و اؤزونو آتار سويا...

يئل باشيني ساليب آشاغي:« دئير دوزدو منيم گوجوم وار ، هر نه يي يئريندن اوينادا بيلرم آما سنين ايراده ن هرنه دن گوجلو و موحكم دير.»

يازار: آي سو

یاییلیب : شنبه 12 آذر 1390 | یازار : آي سو،ساراي سولدوزلو | بؤلوم : ادبي متن لر | 0 باخيش لار

تله س

تله س، گل. مني فيرتانايا سالماغا تله س! وور، آغلات، مني اؤزومدن آلماغا تله س!

تله س، يوللارا پاييز قوخوسو دوشمه ميش گل، گؤزلريم شكيليني ايتيرمه ميش گل! منه دئميشدين گؤزلريني يوم، اوناجان سايسان بوردايام.  بير، ايكي... اون ساعات، اون گون، اون آي، اون ايل.. دونيانين بوتون اونلاريني سايديم.. گؤزلريم آغرييير داها آچيلمير، سوسوز تورپاق قالماييب كي گؤز ياشلاريمدان ايسلانماسين،من سنه بير يعقوب، يوسوفوم اول گل! گؤزلريمده سني ايتيردييم ايللر بويو تورپاق قالانيب، تله س گل، هله منليييمين قوخوسو گلير تورپاقدان، هله ايستيدير تورپاغيم، من تورپاغا دؤنمه ميش گل!

آ جانيم. نفس لريم بويدا اينتيظارلا گؤزلورم سني، يئرين نبضي چالينجا سسليرم سني، تورپاغيمين گوللري سن بويدا اولوب، گل، گل هله گؤر نئجه سئويرم سني..

من تورپاق اولسامدا، چوخ اؤزلورم سني، چوخ سئويرم مني سئوه سن! مني سئومه يه تله س..!!

گل...

يازار: آي سو

یارپاق لار : 1


Powerd By : ARZUBLOG.COM Theme Designer : Blogskin.ir