سورگون

^{تانيش بير قوخو بورنونو سيغيشديردي، نه اولدوغونو بيلميردي آما بو قوخواونون ايللر بويو ايتيب- باتان حيسس لريني اوياديردي، «بلكه...آما يوخ.. يوخ بو ايش ايمكان سيز. من بئله موتلو اولا بيلمرم » بو اولايا دوشونمك اونو آياقدان ساليردي، آما بو قوخودان واز گئچه بيلميردي، نه يي ايتيرسه، نه يي اونودسادا، بو اونودولان بير شئي دئييل.. گؤزلرينين آغري سيني بيرداها يئني دن حيسس ائتدي، گؤره بيلسه يدي كاش!! اللري آج ليقدان قورتولان قورد كيمي كلفچه ني(دست بند) سينديريب بير- بيريندن آيريلماق ايسته ييردي، بلكه بير تانيش بير شئي لمس ائديب دينجه لسين، آياق لاري تيريم- تيريم اسيردي سانكي ايندي ايشكنجه آلتيندان چيخيب ميش.اوره يينين سسي ني ائشيديب بيليردي بو تانيش قوخو اونو تالواسالا ساليب. «.. نه بو تانيش قوخو؟؟.. نه بو تانيش قوخو تانريم كي بئله مني ايللر بوندان اؤنجه يه آپارير؟ بو پولاد آرابادان دوشه بيلسه يديم كاش.. بو آرابا كي ايللر اونو سينديرماغا دوشونموشم و ايندي منيم اسگي يولداشلاريمين بيري اولوب، فيكير داشلاريم و ديلداش لاريمي آلان بو آرابا!! هله دير بو سوروندوكده ائلمين مارشيني ائشيده بيليرم،هله دير زامان توزو باسماييب او سسلري، هله دير قان قوخويور هر حيسسه سي، ايهانت قوخويور بو آرابا!... آما ايللردير يولداشلاريمين ايزيني يالنيز بو آرابادان آلا بيليرم، بيزي پارچالاييب داغيداركن اومورام بيزي دوشونور، بلكه ده اودا بو بؤيوك ظولمدن دويوب، اونا قارشي دورماق ايسته يير.. آچ قاپي لاريني آي آرابا! آچ! سني تانري بو كز مني دوشون!.. آچ بو باغلي قاپي لاري...! »}

^{قيش لاريندا ايختييار يوخدو يول يئريمك ايچين.. نه آجدير، نه ده گوجسوز. آما بو قوخو.. بو عطيرلي هاوا... بو لذذتله دولو نفسلر اونو قرار سيز ائدير... دونيا باشينا دولانيردي.. يارالي قوش كيمي فيرلانيب، ده يدي يئره... باشي ايسلاندي، دوشوندو:«يئره ايستي سو تؤكوب لر..»}

^{بورنوندا داها بير تانيش قوخونو حيسس ائتدي؛ قان قوخوسو!! اؤز قانينين قوخوسو و سئوگي سي تورپاغين عطيريني..، ييخيلميش دوغما يوردونون قوينونا، اونون اوچون ايللر سورگون اولموش... يولداش لار و فيكيردالاريني الدن وئرميش.. چتين ليك لر و آجي لار چكميش..و..}

 ^{ايندي توم وارليغييلا، سللول لارينين هر تك به تكي ايله موتلولوغو حيسس ائديردي نييه كي تورپاغ قوينونو اونا آچميش و او دوداغيندا كي سون گولوشله سئوگيلي سينين گؤروشونه گئديردي..}

 ^{يازار: آي سو}