| |
اويان باجيم،ساليب لار بيزي قفسه آه چكيب قان اودوروق هر نفسه سوسماق اولوب نشانه يه متانت متانتين لازمه سي اطاعت دينچي لر ائديب لر وسيله بيزي قادين حاققينين قالماييب هئچ ايزي اؤلدون بهشت آياقين آلتيندا اود ايچينده سن،ديري واختيندا آناا دئمه ياساق بير سؤزاولوبدور يابانجي ديل توركو يئرين توتوبدور بالان گرك قاييدا اؤز اصلينه اؤيرد توركونو گله جگين نسلينه فارسجا دانيشماغي افتخار سانما آنا ديليني هئچ بير شئيه ساتما تاريخه باخ نگاري گؤر فخر ائله شاهنامه لردي يازيليرلار يئنه زينب پاشادان اؤيرن غيرتي گناه كارسان قبول ائدسن ذلتي
saray.sulduzlu 1390/3/4 | |
نوشته شده توسط:ساراي سولدوزلو، آي سو
وطن قارداشي
وطن قارداشي دئديم بو يولدا سنه
دئديم بويوك قارداش سان، داياقسان منه
وطنيمه اؤلورم دئيرسن يئنه
چيخارمي سس اگر اولسا ال بير دنه؟
دئديم اليمدن توتوب يارديم ائدرسن
گوردوم اياقدان چكيب سونرا گئدرسن
ايله ش يئرينده،سن قيزسان منه دئيرسن
هله سورا منيم قدريمي بيلرسن
ميللت چي ليقي آپاريب شهرت سئلي
سن ايستيرسن قوروياسان بو ائلي؟؟؟
گون به گون آرتيريرسان آرادا كئني
بو ايشلردن سينديريسان وطن بئلي
منده ائلين قيزيام گل بير چاليشاق
بيز گرك بير بايراق آلتيندا ياشياق
بيزيم آماجيميز اؤزگورلوقدو ،گرك
باجي قارداش اولوب ، بيرليكدن باريشاق
وطنيميز ايستير بيز بير اولاق
دشمندي ايستيير ايلگيميزي پوزاق
ايستيرلر يولوموزدا قويو قازاق
ياخين يولو ائديرلر بيزه اوزاق
وطن آناميزدي ، سن سن قارينداشيم
گورسم يامان گونده سن آخار گؤز ياشيم
بير سئوگيليم وار، مين لرجه قارداشيم
ساراي دي منيم آديم، اوجادير باشيم
تيلفونو گؤتوردوم، اللريم اسيردي، اوره ييم بير بالا قوش اوره يي كيمي چيرپيردي، آغزيم دوزلاق چؤللر كيمي قوروموشدو
****
يئنه دوزلاق دئديم بوتون آجي لار ياديما دوشدو، بير سوسوز دنيز، بير حاقلي ميللت، بير بئيني بوش قورولتاي... بيرده ديل قانماز سيلاح لار و قورشون لار..
دوشوندوم اولمايا عاشورا تيكرار اولوردو او گون كي بير الي يالين ميللت باغيريب سوسوزلوقدان جان وئرن دنيزينه سو ايسته ييردي.. ندن سو يئرينه جاواب گؤز ياشي آرتيجي قاز و قورشون ايدي؟؟.
*****
تيلفونو كؤكسومه سيخيب گؤزلريمي يومدوم، خاطيره لر تابلوسونو گؤزومون اؤنوندن گؤتورب نومره ني توتدوم.. ايشغال.. دوشوندوم هئچ زنگ آچماييم، نه ييم وار دئمك ايچين آخي؟؟ دئييم دولانماق خوش كئچدي؟ سوروشوم هارالاري دولاندين؟؟ آمان تانريم نئيله ييم؟؟ بيلسه بو نئچه گونو اونون دوشونجه سي ايله هر آنيم اون ايل كئچيب اوزولر.. يولداشلارينا تاپشيريب توتولسا منه دئمه سين لر هاردادير... آما نه ياخشي اولاردي بيلسه يدي من هر آن اونا دوشونورم و اونون يولو منيم يولومدور، ندن بولاري ايندييه دك دئمه ميشديم اونا؟؟ اوره ييم سيخيشدي، سانديم ايندي بوغازيمدان چيخار ائشيگه، تيلفونو گؤتوروب يئني دن نومره ني توتدوم. بير يورقون سس دئدي:« الو..» نه تانيش و ايستي بو سس! بوتون بورقونلوغوايلا بيليرديم گولور، هئچ زامان توتقون اولمايان سئوگيليم كسين ايندي ده گولوردو... سس يئنه دئدي «الو.. دانيشماياجاقسيز..؟..»
دوشوندوم بو ائليميزين ايلك آدديم لاريدير، سئوگيليم بوآدديم لاري آتماقدا ندن من اونلا يولبير اولماييم؟؟ گوجومو ييغيب تيترك سسله دئديم:« دوستاق خوش كئچدي؟؟ بو كز نئچه سيلله يئدين؟؟ يئنه اللريني باغلاييب سني ووروركن آجي سؤزلردئديلر؟؟ گؤز ياشلاريمي ييغميشام شوشه يه، گؤزلورم گله سن بيرگه آپاريب تؤكك دنيزيميزه...» گؤز ياشلاريم ماجال وئرمه دي اوجا سسله آغلاديم..
تئز اؤزومه گليب ياشلاريمي سيلديم. بير درين نفس چكيب، بو يولا اولان گوجلو ايناميم كيمي گوجلو دانيشماق ايسته ديم، موحكم دئديم:« بيليرم بو سون كز دئييل، بيزلر بو يولو گئتمه ليييك، گلن دفعه خانليغا گئدنده مني ده آپار. من ياخشي يولچو و گوجلو فيكيرداش اولماسامدا ياخشي يولداشام..، گله جك ده سينايا بيلرسن... منده ائليميزين باتميش حاقلاريني آلماغا چاليشاجاغام.. بو يولدا باتوم قوناغيم اولور اولسون ، سيلله قوناغيم اولور اولسون بلكه ده موتلو بير اينسان اولدوم و ائليمين يولوندا قورشونلار قاپيمي چالديلار.. توم بو آجي لارا حاضيرام يئتر بير قورو نفس ايچين سوسماغيميز ...»
يازار: آي سو
سونورام بوتون دوستاق چكن ديلداشلاريما...
