ايزلريميز
azərbaycan ədəbiyatının gözəlliklərindən bir bucaq
یاییلیب : شنبه 12 آذر 1390 | یازار : آي سو،ساراي سولدوزلو | بؤلوم : قادين | 0 باخيش لار

سيزه سونورام...

 سن مني سئوميردين، هئچ زامان. يالنيز من اؤزومو آلداتيرديم و اينانا بيلميرديم  سنين  يوخلوغونا، ايندي سه  اؤزومـو  سن سـيز دوشونه  بيلميرم.  سن سـيز  ياشايا بيلميرم،  گون لريم  گئچمير، اولماسان گئجه يه سورگون اولموشام، اورييم سيخيلير، اودلانير، يانير آما دئيه بيلميرم؛  سنين نه يي نه آلدانديم؟  ندن بئله وورقون اولدوم؟ سني گؤرنده ديليم دوتولور، اللريم اسير، آياقلاريم اوستده دورا بيلميرم، ندن بئله اولدوم؟  بيلميرم. من يالنيز بيليرم سنه سؤز دئمه لييم، يالنيز بير سؤز. آما سنله گؤروشنده، سنله  دانيشاندا، هر ندن سؤز آچيرام اوره ك  سؤزوندن سونرا. من بو باره ده ساعاتلار چاليشميشام، آي لار دوشونموشم، بلكه ده ايللر... هئچ بيلميرم... زاماني دا ايتيرميشم. من يالنيز ايسته ييرم بير سؤز دئييم بير عؤمور ايسته ديم  دئييم اولمادي،  من آنام دان اؤيرنديم؛  كيمم، نه يم...  آنام  همئشه  دئييردي: « قيز گرك آغير اولسون... ، قيز اوجادان گولمز!.. بيرينين اوزونه ديك-ديك باخماز!.. » آنامين دئديكلريندن آنلاديم كي  آنجاق هر نه يه دوشونمه لييم  اؤزومدن و اؤز احساسيمدان سونرا. آنامدا آناسيندان اؤيرنميشدي...

آنامين سئوگيسيني آتاما،  پيشيردييي  يئمك لرده،  همئشه  حاضير چاي دا، تر-تميز ائو ائشيگينده، بلكه ده آنامين سئوگيسيني تيترك اللرينده گؤردوم؛ آتام بورما بيغلارينا ال آتان زامانلار، قاشلارين دويونله يه نده، يوخسا اوجا سسله آناما بير سؤز دئيه نده... او آنلار آنام اؤزون ايتيريب، اللري اسردي.  آما آغلامازدي، هئچ  كدرلنمه زدي، آجي مازدي دا... .  بلكه ده آنام كدريني گوللو فرشه دويونله -دييي الوان ايپك لرده گيزله تميشدي... بير كز آنامين اللري اوقدر اسدي كي ياريمچيليق فرشيني منه تاپشيردي.. آنام گئتدي.. ايندي سه منيم اللريم اسير، منيم اللريم آما آغريدان آجي لاردان، كدردن يوخ.. منيم تيترك دوداقلاريمدا ايللردي بير سؤز قورويوب، من ايللردي سئومك باشارسامدا سؤيله مك باشارميرام...

يازار:آي سو

   
یارپاق لار :


Powerd By : ARZUBLOG.COM Theme Designer : Blogskin.ir