ساعاتا باخدي، ساعات ايكيني اييرمي دقيقه كئچيردي، اوره يي دؤيونوردو، ايضطيراب و اينتيظاردان بوغولوردو، آجي دوشونجه لر ذهنيني جيزيخ لارييرديلار...
يئنه ساعاتا باخدي، ايكيني اييرمي ايكي دقيقه؛ بو دقيقه لر ندن بئله اوزون سورونور؟؟ ندن گئج قالدي؟ هر زامان بير يئره گئتسه يدي اؤنجه دن خبر وئرردي... بس ايندي هاردا قالدي گلمه دي؟ ... مين لرجه جاواب سيز سورو باشيني دولدورموشدو، كاش بيري سورولاريني جاواب لاياردي.. آمان تانريم بير ياريمدا ايش يئريندن چيخيب، اييرمي دقيقه ليك يولدا ندن بير ساعات گئجيكيب؟؟ يارادانيم هر ياندا اولسا اؤزون يارديمجي سي اول.
دؤرد ياشيندا اوشاغي جئيران باخيش لي گؤزلرله آنانين تالواساليني ايزله ييب، دوداغيندان مين-بير سورو ياغيردي؛« آنام ندن بئله اؤزون قاپي- باجايا چالير؟ آتام ندن بئله گئجيكيب؟ ..» سانكي اوشاقدا آتاسينين غئيبتيني دوشونوب تالواسالا دوشموشدو... اويونجاق(اسباب بازي)لاريني گؤتوروب، يئنيدن آتيردي. آزي اون كز هر بيريني گؤتوروب آتميشدي، آما بو ايشدن يورولموردو.. بلكه ده بو ايشله اؤز باشيني قاتيردي...
گؤرن بو آنا- بالا ائوين آتاسينين بير ساعت گئجيكمه سينه بئله داريخيرديلار يوخسا گيزلين بير خبرلر وار كي يالنيز اورك لر ايلگيسي بيلديري وئرر؟؟
بير داها نوماراني دوتدو، دسترسده اولماديغين خبر وئرن قادين ايندي نومارانين سؤنوك اولدوغونو خبر وئريردي... رنگي خزل كيمي سولوب، تيلفون اليندن دوشدو.. آجي دوشونجه لره دؤزوب اؤزون ايتيرمه ين قادين بو آغير ضربه يه داوام گتيرمه ييب پاييز يارپاغي كيمي يئره سريلدي.. اؤزونه گليب گؤردو دؤرد ياشيندا اوشاغي بالاجا اللري ايله آنانين گؤز ياشلاريني سيلير.. و «آنا. اويان» دئيير.. جيب تيلفونونون سسي چوخ اوجا و آغريلي ايدي ، تيلفونو آچاركن قوجاسينين يولداشي تيترك سسله دئدي:« باجيم تاسوفله خسته خانايا گلمه لي سينيز....»
يود و آلكول قوخوسو هر ياني بوروموشدو، آغ كاشي لارا باخاراق آدديم آتيردي، هر آدديمي آتديقجا اومودسوزلوغا دوغرو گئديردي. دووارلار و يئراورك چيرپينتيسيني ائشيتديكجه اونون لا دانيشيرديلار، و ايشيق لي باخيش لاريلا اونا آيدين گله جكدن دئييرديلر. آما هر كس نه دئيير دئسين بو هاوا هر نه يي آنلاديردي اونا، هاوادا موتلولوق قوخوسو يوخويدو، هاوا يود قوخوسو وئريردي، كافور، بلكه ده.... ياشلاري آخدي، گؤز ياش لاريني سيلمك ايچين الينده گوج يوخويدو، باشي دولانيردي، بير آن دونيا قارانليق اولدو، يورقون قادين دا هئچ نه گؤره بيلمه دي.. سونوندا هر نه آغ گئيينميشدي گونشين شفق لري پنجره دن يول تاپيب اوتاغا دولوردو.. آما ندن بو ايشيق لي گونده اينسان لار قارا گئييب آغلاييرديلار؟ هر كس بير سؤز دئييردي، «.. اؤزلري ايسته ديلربئله اولسون كي ديليميز باغلانسين...».. «ايسته ديلر هم سرداريميز گئتسين، هم هئچ كس سوروملو اولماسين...» .. سونوندا آناسينين سسي ايدي كي دئدي :«بولار اؤنملي دئييل لر يالنيز ائليميزين باشي ساغ اولسون. منيم بالام ائل شهيدي دير من بولارا اوزولمه رم.. » چوخ سؤزلر دانيشيلدي آما كيمسه اونون سوروسونو جاوابلامادي؛« ندن بو ايشيق لي گونده بو آدام لار بئله قارا گئيينيب آغلاييرديلار؟»
يازار: آي سو
